Tradisjonsmat
Du veit sikkert kva ein tradisjon er. Tradisjonar er noko vi gjer om att og om att i løpet av livet, til dømes feirar vi høgtider og 17. mai. Vi kan ha mat som tradisjon òg, og då meiner vi mat som er blitt eten gjennom fleire generasjonar - til dømes mat som både du, foreldra dine og besteforeldra dine har ete. Kjøttkaker i brun saus er norsk tradisjonsmat.
Kjøttkaker i brun saus
Ingrediensar:
Kjøttkaker:
400 g kjøttdeig
1 1/2 ts salt
1/4 ts pepar
1/4 ts malen muskat
1/4 ts malen ingefær
2 ms potetmjøl
1 1/2 dl mjølk eller vatn
2 ms flytande magarin til steiking
1 løk
6 dl kjøttbuljong (=6 dl vatn + 1 kjøttbuljongterning)
Brun saus:
5 dl buljongkraft frå kjøttkakene
jamning av 3 ms kveitemjøl utrørt i litt kaldt vatn
ca. 1 ts salt
ca. 1/2 ts pepar
ca. 5 dropar sukkerkulør
Grøn ertestuing:
1 liten pakke frosne erter
1 dl kjøttbuljong (= 1 dl vatn+ 1/4 kjøttbuljongterning)
2 ms flytande margarin
1/4 ts pepar
Slik gjer du:
Kjøttkakene:
1. Bruk ein trespade eller nyvaska hender og rør saltet godt inn i kjøttdeigen. Rør inn krydderet og potetmjøl og tilsett mjølk eller vatn, litt om gongen.
2. Form runde kaker ved hjelp av ei skei og handa di. Dypp skeia i eit glas vatn mellom kvar kake.
3. Ha margarin i steikepanna og steik kjøttkakene på middels varme i nokre minutt på kvar side - til dei har fått ein fin brunfarge.
4. Finhakk løken.
5. Ha kjøttbuljong i ei gryte og varm den opp. Ha i kjøttkakene og løken.
6. La dei småkoka i ca. 10 min til kjøttkakene er gjennomkokte.
Brun saus:
1. Bruk ei holsleiv og ta opp kjøttkakene fra gryta og legg dei på ein stor tallerken.
2. Kjøttbuljongkrafta i gryta skal bli saus. Dersom du ikkje lager kjøttkaker, kan du bruke 5 dl kjøttbuljong.
3. Bland kveitemjøl med kaldt vatn og spe (tilset litt og litt) i gryta under omrøring til sausen er passe tjukk.
4. La sausen koke i 5 minutt.
5. Smak til med salt og pepar.
6. Tilsett sukkerkulør til du får passeleg farge på sausen. Rør godt.
7. Ha kjøttkakene tilbake i sausen og kok han opp, slik at kjøttkakene blir gjennomvarme.
Grøn ertestuing:
1. Kok opp dei frosne ertene i kjøttbuljongen.
2. Mos alt med ein stavmiksar, ein matprosessor eller eit potetmosarjern.
3. Tilset margarin og smak til med pepar.
Server kjøttkakene med brun saus, kokte poteter, grøn ertestuing og tyttebærsyltetøy.
